下星期二（28號），通勝話宜祈福、開市，但華華就覺得，應該加埋宜投票！呢一日，除咗國美（493）小股東會投票為「黃陳鬥」定輸贏，喺離我哋唔係好遠嘅上海，滙豐控股（005）董事會亦會表決定出邊個做新獅王─新任主席是也！
而喺博彩公司開出各路人選嘅盤口之後，英倫大小傳媒繼續為自己所撐嘅「候選佳麗」放風出招，其中權威財經報紙《金融時報》更鍥而不捨當連續劇咁寫！繼上回寫到行政總裁紀勤以「劈炮」威脅換個主席位後，噚日就話財務總監范智廉最有機會彈出！

紀勤　桑頓仲係大熱

佢哋引述3位影子先生嘅消息話，為咗令紀勤可以長駐香港，一定要搵個願意坐鎮英國大本營嘅人接任主席，而最佳人選就係范智廉嘞！就連野村嘅分析員都撐范智廉喺業界深受尊崇，又得到投資者嘅信任，係最適當人選喎！
除咗范智廉，紀勤同中國通桑頓都仲係大熱，因為紀勤話晒根正苗紅，喺老牌大行點都着數啲；而高盛出身嘅桑頓，佢嘅外人身份又居然得到部份董事嘅青睞喎，因為有人相信桑頓呢位外人先可以幫滙豐呢隻百年老獅注入活力喎。
之但係日日咁寫，個個寫勻，咁《金融時報》到底喺表決前夕可唔可以爆到誰是贏家呢？大家不妨拭目以待！

mailto:[email protected]