迎接下周日「情人節兼年初一」嘅香港天氣即將轉冷，好彩適逢周二係美國《體育畫報》年度泳衣水着特輯嘅推出日，多得呢班身材火辣辣嘅美女，成為一眾球迷抵禦寒冬嘅最佳方法！
今期最大嘅驚喜就係22歲嘅塞爾維亞美女伊娃諾域都有份影，其中輯相最誘人嘅就係佢化身「粉紅嬌娃」，身穿粉紅色Bikini瞓喺一大堆粉紅色嘅網球之上，盡展迷人體態；至激相片就係伊娃著住黃色Bikini嗰張啦！張相仲影到伊娃「飛釘」㖭！真係美艷程度簡直爆晒燈！有興趣睇呢張「激凸相」嘅讀者，可以㩒入《蘋果網》睇啦！

韓迪卓娃舒娃都影過

喺09年當選美國網站Tennisreporters.net嘅「最性感女網球員」嘅伊娃諾域，係繼06年俄羅斯嘅舒拉寶娃、09年斯洛伐克嘅韓迪卓娃後，為《體育畫報》拍攝泳衣照嘅女網球員；之但係伊娃已經唔係第一次影性感照，佢喺08年就曾替男性雜誌《FHM》拍攝泳衣照，之不過伊娃就話呢次係最為難忘嘅經驗，伊娃話：「呢次係一次寶貴嘅經驗，拍攝過程非常有趣同甚具挑戰性，亦好享受同拍攝泳衣水着嘅頂尖團隊合作。」
伊娃咁識講嘢，唔通係想下年再同佢哋合作？話晒每年《體育畫報》嘅泳衣特輯，全球都有超過1億讀者，對於伊娃拓展事業應該好有幫助；皆因08年奪法網冠軍嘅伊娃喺網壇事業正陷低潮，曾任「1姐」嘅佢現時世界排名仲跌至23位；而我求大俠期望靚靚伊娃，喺新一年會行好運吧！