一向敢言嘅香港藝術家程展緯，早前趁特首林鄭月娥出席《明報》創刊60周年酒會期間，同另一名藝術家黃宇軒向林鄭高舉「撤回惡法」標語抗議，最近佢仲為6.9「反送中」大遊行，創作咗一批啜核又點題嘅示威道具，其中一個作品係寫上「亂拋垃圾 人見人憎」八字，再附上一對港人近年熟悉嘅「鄭若驊式」白眼嘅標語。

八方問過程展緯，佢話鄭若驊早前面對傳媒提問時，「反白眼」形象深入民心，批評鄭過去不但無喺《逃犯條例》修例一事上守護香港法治，面對巿民同傳媒嘅態度亦高傲，連利益申報都無做足，直斥：「佢（鄭若驊）一直都人見人憎㗎啦！」

至於另一件作品就見到林鄭自己一人企喺個Disco波上面。程展緯話因為林鄭過去一直只活喺自己世界，對於民主派議員、外國領事、大律師公會對「送中」條例嘅質疑，林鄭唔係話人誤解，就係話人講廢話，又拒絕同議員及選委對話，情況令佢諗起「小王子」故事中只有一個人活喺星球上嘅情景。

程展緯考慮喺遊行中分派呢啲示威道具畀巿民示威，希望表達到巿民不滿政府硬推「送中」惡法嘅心聲，佢個人最希望6.9可以多啲香港人參加「反送中」遊行，「因為唔知將來仲有幾多呢種機會，有咁多人咁齊心走出嚟遊行，希望大家都盡力一啲！」

昔日新聞：電視辯論互叫熄咪 曾：你係撕裂2.0 林鄭：會順應民意辭職

相關新聞：【不斷更新】全港大中小學學界聯署「反送中」

【引渡惡法●懶人包】大律師公會逐點K.O.政府修例理由
【引渡惡法●懶人包】一文睇晒立會法律顧問7點質疑修例

民陣6.9反惡法遊行

日期：6月9日（日）
集合地點：維園草地
時間：下午2時30分集合、3時正起步
遊行路線：維園草地遊行至金鐘添美道立法會
（資料來源：民陣）

---------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX