動物誤闖公路的事件時有發生，有的慘成車下亡魂，有的卻幸運得救。有網民近日在屯門公路目擊一宗警員為了拯救迷途小狗，駕駛警車慢駛尾隨，最後更截停3條行車線的車輛，兩名警員落車狂奔追狗，獲網民盛讚「有愛心」、「感激大愛嘅警察叔叔，為迷路嘅毛孩導航」、「呢啲先係我哋要嘅警察」。

《車主雜誌》facebook周日（15日）發佈一條長約兩分鐘的片段，片中一輛警車在屯門公路緩慢地往屯門方向行駛，原來是因為車頭前方有一隻米白色狗狗，沿著路邊防撞欄慢慢前進。警車可能怕會嚇走狗狗，一路只有開著車頂警示燈，但未有鳴笛。

警車護送一段路程後，狗狗都未能找到地方離開公路，眼見後方慢線將有車輛駛至，兩名警員隨即落車，並指示後方的車輛停低，之後再跑了一大段路追狗。雖然影片未有拍到警員是否成功救狗，但該專頁其後留言稱，「以上片段後約十秒，警車已揸上前面快相位，並放車走。估計那兩位警察應該捉到的」。

不過，專頁的「良好意願」終歸落空，警方回應查詢時表示，當日中午收到多名市民匯報在屯門公路近荃灣一帶發現有一隻疑似迷路狗狗在公路上亂闖，於是派人在附近兜截，最終在荃灣麗城花園附近發現其蹤影。發言人稱，雖然兩名警員曾嘗試上前拯救，但狗狗竄到公路旁一處缺口便逃去無蹤。

【網民咁講】
Mia W：邊度都有好人有壞人，從來都唔會仇警，只對事不對人，今次唔係俾個Like咁簡單，要俾個❤
Janet Ng：感激大愛嘅警察叔叔，為迷路嘅毛孩導航
Elle Chan：呢啲交通部就真係值得受尊重
Tze Ben Luke：呢啲先係我哋要嘅警察
May Lam：有呢幾位呀Sir做動物警察就好，起碼尊重生命
Kwai Hei Wong：左邊個架車會唔會心諗：「我唔係人肉路障呀嘛？」

《蘋果》沙士15周年系列網站，正式登場：
https://hk.feature.appledaily.com/sars15/