周三晚聯儲局冇QE3推出，周四晚歐洲央行議息後亦唔見有新招，雖然行長德拉吉話歐央行可能採取進一步非標準措施，同埋直接嘅公開市場操作，但又話歐豬國要尋求EFSF援助，歐央行唔能夠取代政府，即係向市場潑多次冷水。佢嘅言論搞到歐元兌美元喺香港時間昨晚8點幾嗰浸，急Chok上1.24又即刻Chok番落1.23樓下，歐美股市又係先升後急回，截稿前未知股市全晚點走，暫時睇過反應認真麻麻。
聯儲局冇配合歐央行，已經聞到臭味，仲要德國總理借啲意外遊，已暗示立場不變，然後德國副總理兼經濟部長勒斯勒爾同埋德國央行總裁魏德曼，維持反對ESM獲發銀行牌照，令到歐央行唔敢出招，如果德拉吉之前捍衛歐元嘅宣言，又淪為口號，咁又係衝散市場信心。早兩日講到，港股嘅技術走勢同基本因素，同時去到關鍵嘅位置，叫大家唔爭在睇晒今個星期，先決定入市。眼見呢一刻走勢麻麻，投資者當然要繼續按兵不動，因為市場隨時有可能由亢奮變為失望，有加劇跌勢嘅危機。
短線方面，睇番期指走勢，6月到家，喺升浪途中，期指觸及60分鐘保歷加通道下軸，之後往往見頂回落，期指噚日亦已經觸及過下軸，按近期趨勢睇，升浪已經去到頂部位置，好快要出現調整。
藍籌股當中，重磅股滙控（005）之前業績唔靚仔，如果歐債解決方案空歡喜一場，內地A股未見轉機，滙控股價好大機會反映番業績差嘅因素，股價有跑輸大市風險。

另一重磅股中移動（941），之前突破90蚊強大阻力，同時出現技術超買，股價就即刻企唔穩，噚日跌番落去90蚊樓下。近年呢隻股每逢升到90蚊左右，就觸發強大沽壓，仲要次次好快質番落去80蚊樓下。事實上，中移動近期出現強勢，基本因素就未有大幅度改善，只不過投資者逐漸將中移動作公用股看待，避險情緒觸發資金流入呢隻股，所以拉高咗估值。晉佳相信，中移動股價走勢暫時唔會脫離過去軌迹，中短線要跌番去80蚊水平唔出奇。
如果市況掉頭，滙控、中移動可以有唔少下跌空間，有可能令恒指跌得較快，持股咪咁老定。

晉佳
本欄逢周一、三及五刊出