周一歐國盃D組，衞冕嘅西班牙差啲燒鬚，好在恩尼斯達喺尾段妙傳碧基入波，幫「狂牛軍團」打破僵局，先至可以1:0險勝捷克。
西班牙門將迪基亞賽前被指涉及強姦案，仲諗住教練迪保斯基會叫佢唞下，用番卡斯拿斯打正選，點知佢都係信迪基亞把關。又係嘅，對住捷克，邊個守龍都冇所謂啦，反正都係睇波多。

西班牙佔盡控球優勢，16分鐘就有威脅埋門，大衛施華落底傳中，艾華路莫拉達中路接應攻門，可惜被反應快嘅施治救出嚟。喺30分鐘後，西班牙全面控制戰局，布斯基斯同洛尼圖先後有腳遠射「飛機」，之後輪到恩尼斯達（小白）笠射斜出。完半場前，受性醜聞困擾嘅迪基亞終於有嘢做，捷克中鋒尼斯特突破越位陷阱一射，但佢射得太正，迪基亞輕鬆救到，兩隊互交白卷。
換邊後，西班牙繼續施壓，莫拉達傳中，捷克中堅胡比歷一撞，差啲擺烏龍，皮球柱邊出界。其後西班牙角球攻勢，雖然施治手槌打出不遠，洛尼圖即刻一射，好在施治又可以用腳擋出。呢場波小白踢得好瀟灑，喺87分鐘，佢喺左路傳中，彎過捷克防線，佢嘅巴塞隆拿隊友碧基頭槌攻入，助西班牙以1:0小勝捷克，打開勝利之門。
文：咖喱