醫委會接到涉及註冊醫生嘅投訴之後，首先會由初步偵訊委員會睇睇有無理據，不過，以往只得一個初偵會，效率麻麻，積埋積埋成幾百宗個案未處理。立法會喺今年3月通過改革醫委會嘅《2017年醫生註冊（修訂）條例草案》，容許醫委會加開初偵會，增加處理投訴嘅效率。

醫委會今日就選出新一個初偵會嘅主席，現任醫學會副會長、家庭醫生鄭志文高票當選，將會同今年4月當選連任嘅另一個初偵會主席張德康拍住上，分頭處理投訴個案。

鄭志文話，暫時未知新一個初偵會幾時開始運作，但就預咗工作量肯定唔輕鬆，因為有好多文件要睇。佢話自己係家庭醫生，唔使入手術室，時間比較彈性，加埋佢診所嘅午飯時間比較長，可以騰出時間，坐定定睇文件，最多犧牲少少休息時間，游少啲水咁話。