徐天佑同名媛莊家蕙今晚去咗藝術中心撐藝術家好友文鳳儀同莫一新嘅藝術展開幕，天佑有份參演嘅《那夜凌晨，我坐上了旺角開往大埔的紅VAN》同《愛‧尋‧迷》兩部戲同時上映。佢話最近畀人搞惡劇照，大讚網民好有創意，佢話:「前幾日暴雨，有人send啲相畀我睇，係惡搞《紅VAN》啲金句，今日我哋又變成唔同嘅局長，真係好有創意，好搞笑，對我嚟講絕對歡迎，當係宣傳，但最好就入場睇。」

至於天佑就話對兩部戲都好有信心，重話自己睇咗《愛‧尋‧迷》，啲情慾戲好有深度咁話。

另外，做咗拍賣行多年嘅莊家蕙，就話自己大學時讀fineart，對藝術有一定認識同興趣，自已都有畫下畫，但重未可以開畫展，亦話香港其實有好多年輕而有潛力嘅藝術家，佢哋好刻苦。