好似全球最大棉紡企業魏橋紡織(2698)嘅老闆張士平咁,上市8年嚟,作風非常低調,平日都好少見佢蒲頭。不過張總唔聲唔聲,其實收埋好多o架!
華華聽聞佢喺山東鄒平縣起家,早年炒棉花炒到第一桶金,後來收購咗一間國營工廠,搞搞吓就變成今日嘅魏橋創業集團,旗下大大話話都有十幾廿間公司。最近係咁易打包隻宏橋鋁業(1378)嚟香港上市,張總嘅身價就即刻唔同計法。
張士平原本只係得魏橋紡織一間上市公司,市值89億左右,以張總持股20.86%計,即係身家大概只有18.6億,當然未有資格上百富榜喇!不過,如果計埋宏橋鋁業,用家個招股價7.1至9.9元去計,宏橋一掛牌,市值就已經達到480億至670億。
以張總持有宏橋74.18%權益計,單係佢手上嘅宏橋股份,就已經值360億至500億!相信宏橋上市之後,張總要打入百富榜頭十位,應該冇乜難度!
李華華
mailto:
[email protected]