黃貫中、夏韶聲、單立文（豹哥）、鄧建明（Joey）同恭碩良五位band壇強人首次合作，今晚喺紅館舉行首場「搖滾大俠奏」band騷，由於豹哥有份拍大台處境劇《愛．回家》，兼且「豹嫂」胡蓓蔚係胡說八道會成員，豹哥獲得最多圈中人撐場，包括胡杏兒同老公、胡定欣、姚子羚、李施嬅，仲有湯盈盈及一眾《愛．回家》演員，另外蔡一傑、杜德偉、陳奕迅爸爸、楊秀惠、袁偉豪等都現身睇騷。

舞台模仿工廠大廈外牆，有街頭開騷feel。甫開騷五子逐個出場埋位，Joey大叫問觀眾：「Are You Ready？」跟住五子合唱太極《紅色跑車》、Beyond《我是憤怒》等rock歌，夏韶聲話：「今晚我哋係Hong Kong Band，香港嘅樂隊。」跟住就唱出《搖擺心窩》，夏韶聲邊彈結他邊唱，仲走去打埋鼓，表現high爆。之後輪到黃貫中solo唱《踩界》，其他人就負責伴奏。

接着唱完演唱會主題曲《膽生毛》後，豹哥問觀眾：「點先？畀啲聲聽下好無呀？未食飯呀？今次第一次成軍演唱會，無理由咁快有咁多fans各有黨派。」之後豹哥再問現場有冇佢嘅fans？台下大叫，豹哥搞笑話：「我啲fans無用㗎，都係嗰啲愛回家、尋寶圖、胡說八道嗰啲，無用㗎……一係你哋每人捐100蚊畀單立文基金。」全場爆笑。

精選娛聞，喺晒《娛果》
http://fb.com/appledailyent

攝影：沈健程