喺龍子行門口等人，望多利源東街幾眼。龍子行明年拆卸，業主新世界已買埋隔籬幾個冧巴，一齊重建。半邊利源東街到咗二○○三年，就成為建築地盤。現時啲攤檔究竟點搞呢？從此消失？香港冇咗一個旅遊點？搬去第二條街？繼續在極狹窄嘈吵環境下繼續營業？一概唔知。照計新世界嘅新廈落成之後，呢啲攤檔會阻住晒噃？旅遊發展局又點睇呢條街呢？
望望吓之際，證券行老細K經過，握手寒暄幾句，老細K面色凝重咁話：「喂，唔好掉以輕心，香港似乎好唔掂，我哋呢行已經難做，我周圍去搵財團，本地基金傾偈，佢哋個個話對特區政府高官冇信心，時亨馬令佢哋大失所望，人人都冇信心投資，一於唔郁。喂，再係咁落去，香港會死㗎，一齊度吓橋得唔得？」

唉，我又唔係劉兆佳，邊度有計。老細K年輕力壯，乃係有心人，香港復甦，佢大把前途，所以基於為人為己之心，為香港謀翻生妙計。不過佢知，我知，的士司機日日嘈，乜人一日在位，信心始終差一啲。除非有朱鎔基咁嘅權威人物，既有權謀手段，又有權威魄力，再加上一啲民主開明作風，先至會刺激到一潭死水回復生氣。講起朱鎔基，老細K話：「我請你去朱總心頭好飲茶，一齊度橋，朱總心頭好？乜酒樓呀？老細K話：「朱總管上海之時，落嚟香港就最鍾意到新鴻基海都，做咗總理就唔去得，冇我哋咁自由㖭！」