當年今日
關於我們

701收料站:絲綢路準備大變身

蘋果日報 2002/11/16 00:00


小初好耐冇炒過創業板股仔,皆因連主板細價股都靜英英,何況創業板股。但近排炒家似乎靜極思動,細價股開始出現異動,而連帶創業板股仔都有搞作。
絲綢路數碼(8071)近排唔經唔覺,由2仙水平一支箭咁抽上去6仙。公司話同獨立第三者,洽商發行可換股債券或者發新股。
經紀黃話,主要係股東講掂數,聽聞隻股嘅業務連帶控股權都可能出現大轉變。
絲綢路數碼基本上係年前科技股熱潮嘅衍生物,既然熱潮已過,股東亦冇以往咁齊心,就算想做嘢都唔容易,家陣講掂數就易話為得多。
至於公司業務方面,家陣重係搞緊互聯網科技一類生意,唔係咁易搵食,轉型搞其他生意可能重好過。
隻股年頭先至發過一批可換股債券,換股價成5仙,所以幕後一傾掂數,隻股抽上亦好正路。
慕容小初