被稱為「神車」的中車（1766）週一上市，首日股價表現仲有勢頭，A股升停，但禮拜二開始狂瀉，至今股價已跌咗超過20%，市值蒸發1700億元人民幣。神車後面仲有好多央企兄弟，「神油」、「神船」、「神煤」排緊隊等住炒合併，如果神車甩轆，恐怕會累成個「神X」系列一起攬炒。

去年底南北車宣佈合併為中車，A股狂升，至今年5月停牌前均升近四倍，令中車市值超過波音飛機，以及所有其他競爭對手，包括德國西門子、法國阿爾斯通等。炒到咁高，因為內地股民覺得中車第日可以獨霸全球，一家玩晒。

實情當然相反，至今中國高鐵喺海外仲處處碰壁。上咗市，等於要面對現實，股價終於要反映。神車仲未止瀉，搞到唔少股民好傷，第日要再炒神油或神煤，就會諗過先。

記者：黃尹華