爭取學生 - 左丁山

蘋果日報 2010/03/18 00:00


上星期某日搭地鐵,企喺電梯時睇到唔少廣告,其中一個廣告宣傳單張係關於美國高等教育展。美國咁多大學,好多名字唔係家傳戶曉嘅,聽華盛頓嘅教授L講,美國大學為咗財政,招收新生各展奇謀,招數甚多,直情有類似大公司嘅「市場部」(Marketing)之設,大搞直銷,搶收學生,故此有一啲學校嚟香港參加高等教育展,好正路啫,香港有不少學生有錢放洋留學,係一個好市場嚟嘅。
話口未完,返到公司就收到香港管理專業協會寄來的一份宣傳單張,為一間BulacanStateUniversity(比立勤國立大學)招收工商管理哲學博士,呢間大學來自何方呀,好似未聽過,睇真啲,原來係菲律賓嘅歷史名校,已有一百年歷史。菲律賓嘅大學都嚟香港招收博士生,以商界行政人士為對象,唔怪得現時收到名片,唔少都係博士,香港人咁好學,難得之至。
跟住又有老友打電話嚟問:「喂,我個女做開QS(quantitysurvey),老闆叫佢讀一個甚麼項目管理碩士,主辦單位係職業訓練局與華威大學。嗱,我只知道VTC唔係大學,華威係乜嘢大學呀,我個女會唔會嘥錢嘥時間?」自己寫得學校多,朋友視左丁山為升學顧問,有問題就打電話嚟,唉吔,係唔係咁信左丁山呀?講起華威大學嘅「項目管理碩士課程」,左丁山已經喺舊年介紹過。冇錯,VTC唔係大學,但有資格與外國大學合作搞新課程,華威大學(UniversityofWarwick)係排名不斷上升嘅英國大學,剛在今年二月得到英女皇頒發嘅「高等教育女王週年獎」(Queen'sAnniversaryPrizeforHigherandFurtherEducation),與牛津大學同獲殊榮,亦在《衞報》二○一○年全英大學排名榜排第四,而前三名係牛津、劍橋、聖安德魯斯,可見實力相當,讀呢間大學嘅碩士,一定唔會失禮。朋友聽完,就話佢睇過啲課程,好啱建築工程界人士攻讀嘅,佢只係要弄清楚華威,是否夠威而已!佢又話華威大學有人嚟香港介紹呢個「項目管理碩士課程」,就在三月廿一日晚上七時半,在灣仔活道VTC舉行,到時會親自陪同女兒去聽吓。