羅霖同亞視前高層盛品儒今日喺中環出席美容公司活動，盛品儒又同人妻亞姐黎虹讌一齊嚟，前晚一次，噚日又一次，今日第三次囉喎，係咪同人妻有乜嘢搞作呀？但盛品儒又閃閃縮縮，唔接受訪問。

對於今屆亞洲先生之「微亞生」、15號嘅高喜民被懷疑做「電召男」，更表明:「1,000元包全套『1069』，房間錢也包。」之前曾與前亞洲先生林睿傳出緋聞嘅羅霖被問到此事時，反應好直接、好驚訝咁問:「1000咁平？」咦，言下之意，唔通羅霖知道公價？佢急急解釋:「唔係試過，只係覺得每個鐘1000蚊好平啫，靚唔靚仔0架？」

羅霖直言謂亞洲先生參賽者良莠不齊，好難避免，惟有靠傳媒爆料，佢話:「選出嚟要有代表性，就算幾靚仔都唔可以有污點。」佢透露啱啱由歐洲返嚟香港，完成咗亞姐旅遊特輯，佢大嘆好辛苦，問佢係唔係亞視經費太少？佢話:「葡萄牙都OK，但法國冇做資料搜集，搞到嘥咗一日時間，鞋都行爛兩對。」此行可有艷遇？羅霖就表示:「法國司機留言ILoveYou，叫我下次搵佢。」名媛陳君宜都啱啱喺法國返嚟，透露喺當地遇劫，經歷非常恐佈。

同場仲有畀人話指撞樣嘅區文詩同何紫綸，兩個人見人冇尷尬，還好大方咁合照俾大家玩photohunt。另外著住大露背裝嘅江若琳透露過幾日就會出發去馬來西亞，爭逐金箏獎女主角，佢自己就睇好李心潔攞獎。