當年今日
關於我們

滙海探戈:八両金上身 紐元開車 - 奇兵

蘋果日報 2014/06/13 00:00


見報時,世界盃已開鑼,巴西對克羅地亞,睇牌面唔使講,但俗語話齋波是圓的,呢個亦係足球引人入勝之處。隨着流動通訊急速發展,家陣用手機睇波落注方便快捷,近日筆者唔少朋友都興致勃勃講波經,不管今屆冠軍花落誰家,馬會肯定係大贏家。世界盃稀客新西蘭上屆贏得入場券,雖然喺分組賽階段三場賽事都打和而出局,但對住意大利亦踢得有板有眼,就足證波係圓嘅。
井噴後例牌回氣
新西蘭今屆冇份,但昨日係金融市場亮點之一,事關該國央行落實再加息0.25厘,會後聲明亦好似星爺《行運一條龍》入面,八両金飾演嘅皇極驚天拳第十代掌門人吳留手咁,揚言息口仲未加夠,立場比市場預期堅定好多,刺激隻Kiwi尋日升到嘭嘭聲,由85.3美仙抽上86.91美仙,創三周高位。
計埋噚日,新西蘭今年已經連續第三次加息,官方利率不經不覺已升到3.25厘,符合預期。不過,央行今次暗示奶類產品跌價對經濟的影響,以及製造業放緩,都不會成為未來加息的絆腳石。行長Graeme Wheeler今次亦沉得住氣,冇重提可能入市干預阻止紐元升勢,僅表示會繼續關注滙市走勢。
市場原本預期,央行今次態度會轉趨審慎,可能暗示短期會拖慢加息步伐,結果卻有點出乎意料,難怪紐元昨日走勢會咁靚仔。不過,參考過紐元今年走勢,每逢出現大棍式抽高後,回調機會好大,由於昨日升幅曾高達1.7%,加上已去到87美仙重要阻力位,以盤路計短期出現回吐機會較大,除非能突破之前高位的87.81美仙,否則就繼續維持之前策略,繼續高沽低揸。就算要博,玩紐元兌歐元等近期弱勢貨幣較穩陣。
油價成加元水泡
歐洲央行上周減息後,歐元持續弱勢,但至今仍未跌穿1.35美元水平,除非失守1.3475支持位,估計短期仍會在1.35至1.38美元徘徊。英國最新失業率跌至6.6%,創五年新低,新增職位更刷新紀錄,繼續證明經濟加快復蘇。不過,上月打工仔人工升幅顯著放緩,呢方面帶來的通脹壓力應該有限,增加英倫銀行維持低息的理據,正如上周所講,英鎊兌美元升勢暫時仍止步於1.7。兌歐元則秤高啲,歐元可能下試至80便士才喘穩。
加拿大經濟欠佳,但伊拉克局勢不穩,刺激油價近期向上,紐約7月期油昨曾升至每桶106.34美元,創八個多月高位,倫敦布蘭特期油則彈上三個月高位,為加國石油業帶來支持,帶挈加元本周反彈至1.08兌1美元水平。

奇兵
本欄逢周五刊登
識睇 一定睇蘋果嘅足動世盃:
http://worldcup2014.appledaily.com/