特首夫人梁唐青儀今日去咗會展美食博覽，出席「國際金茶王大賽」，致辭嘅時候，講笑話自己今年唔想做評判，因為上年覺得杯杯都咁好，一度揀唔落手，諗住揀香港代表，但又怕自己係偏心，好彩最後真係香港人贏咗。

講到老公梁振英同過咖啡紅茶協會主席黃家和學沖奶茶，梁太就話今晚番屋企，就會叫佢沖番杯嚟飲，仲話好期待添。唔通CY咁耐都冇乜點沖過奶茶佢飲？

同場嘅教育局局長吳克儉就話，根據統計，香港人一年就飲10億杯奶茶，如果每杯係10蚊，一年就有100億嘅經濟效益。