余香凝（Jennifer）同陳家樂嘅3年多情玩完，余香凝仲被爆疑偷食保險才俊Victor，不過雙方都強調今次嘅分手同第三者冇關係，陳家樂仲多次維護分咗手嘅余香凝。不過就算手已經分，余香凝被網民無限負評，都無阻佢過節，早前佢同妹妹余潔瀅（Zoe）為應節日前特登搵咗師傅學包糉，咬住鹹水草嘅Jennifer好有型咁話：「包糉要有牙力、又要有實力。」不過轉頭已經太大力扯斷鹹水草；Zoe跟著師傅默默包，幾個步驟後已大叫：「點解啲饀料跌晒出嚟既？」正式學包糉嘅兩姐妹，笑料百出倒瀉籮蟹。

自言好少入廚，亦只會煮即食麵嘅Jennifer，雖然包糉並不純熟，但其間仍不忘發揮創意，學了包方型及長筒型糉後，自創包心型糉，左紮右紮下憑幻想大概可以估到係心型，妹妹仲笑Jennifer包到好似哈佬咭蒂貓頭上嘅蝴蝶結。

而最近Zoe參加大台嘅烹飪節目做學徒，佢平時都會下廚，煮意粉、煎牛扒等等，最叻煮瑞士雞翼，全都由余媽媽教授，佢大爆兩姐妹細個好似地獄廚神咁，差啲燒咗個廚房：「我哋試過整杯麵，落咗凍水就放入微波爐，點知冇摵走錫紙，燒咗微波爐個頂。」Jennifer就話學過下廚但沒天份，佢話自己向來對食冇乜要求：「我個人好心急，有時打邊爐啲嘢唔熟都照食，諗住最多都係肚屙啫。」

採訪：王連連
場地提供：城寨風味
髮型：Ken Hui＠ii Alchemy hair & nail
化妝：Jennifer Chan＠Annie G Chan Makeup Centre

精選娛聞，喺晒《娛果》
http://fb.com/appledailyent