開鑼戰編跑十場，全草地用利跟前的B跑道角逐，季初選馬唔容易，特別現時暑期越來越短，馬匹休息未足夠。經驗所得，操得太密未必好，少跳未必唔得。

第二場五班千六米，「天狼星」上季在谷草短途取得兩WIN，今次出戰田草1600米，睇復課積極備戰，試兩個大閘都好輕鬆，搶放末段按實保持勁勢，老馬身壯色潤，論狀態是全組馬最好。「天狼星」上季主攻快活谷短途，但前季兩戰田草1600米，都能爭入季軍，韌力無須懷疑，今場無馬走，以其速度應可輕易擺前走，單騎領放，操控步速做好留放，就有權帶到，有賠率可以一博。

同場「智有心得」上季尾在1800米出擊，沈拿已發揮甚佳，但負於落班即郁手之「火天大有」，承接這勢頭，小休復課狀態好穩定，今次用莫雷拉，據悉是一早索騎，恨贏戰意鮮明，是正路之選。「馬飛龍」彈草閘表現甚佳，有班利之馬，做好留放當然可介入爭拼。「神電金剛」拍跳三課均出色，跳贏高班廐侶，可兼顧。「甜統」落五班有着數，大摩部署恰當，埋門馬房幾匹參戰馬，狀態都有進展，可考慮作配。其餘「超自然」試閘起步唔慢，直路也肯追，但失準難靠。