【新增影片】

呢兩日嘅晨課真係意外多多，尋日（11日）先有「大龍騰」將鞍上嘅霍利時馬房助手，喺草地彈閘嘅時候拋跌，撻到騎馬人癱癱腰，即時要用擔架由救護車送往醫院治療，好彩人馬都冇乜事。

去到今朝（12日），就到麥菲文馬房出事。旗下未命名澳洲自購新馬（烙號B255），經助手操完一課內圈快踱，由馬匹通道回馬房嘅時候，就將騎馬人拋跌，更經過機坪直奔馬房。

途中，唔少馬都俾呢匹頑皮馬搞到嚇一嚇而起擒，好彩其他馬有人捉實而冇再出事。之後，馬房副練余詠詩同助手隨即跑前跟上，捉回呢匹發脾氣馬，人馬喺今次意外都冇大礙。

另外，剛停賽復出的見習生潘明輝，於今早第12組試閘策賀賢馬房的「揮闖」出閘未幾，即失平衡墮馬，在場救護團隊即趕到意外現場，為火車潘作初步治療，最終他沒上救護車就醫，似乎傷勢不大，而「揮闖」亦沒大礙。

馬會賽事醫療主任事後亦證明潘明輝已無恙，適宜出戰明晚（13日）谷草賽事。