當年今日
關於我們

【李八方online】何柱國林鄭大戰後 《東周刊》感謝娥特「訓話」

蘋果日報 2018/09/24 17:59

李八方ONLINE林鄭何柱國東周刊

近期政圈花生指數最高嘅八卦事,當然係《星島》集團老闆、身為全國政協常委嘅何柱國,喺上周三於《東周刊》舉辦嘅「香港經典品牌」頒獎禮,同特首林鄭月娥就打擊「港獨」同搵地建屋事宜唇槍舌劍。八方當日都有報道,娥特就政事還拖之時,仲對《東周刊》有「提點」,佢致辭稱品牌要有三個特質:credibility(可信)、reliability(可靠)同adaptability(與時並進),強調「東周刊再過一段日子能否滿足這三個要求,大家拭目以待」。好一句「拭目以待」,在場有人吖大口問:林鄭其實係咪唔識呢個成語?竟然喺《星島》嘅地盤,咁唔畀面?
事隔近一周,《東周刊》果然冇令花生友失望。今日出版嘅《東周刊》就喺【政官莊】欄目,刊登題為「衷心感謝特首訓話」嘅回應,文中引述當日林鄭上述言論,先指「本刊特別感謝特首的訓話」,繼而強調《東周刊》復刊15年來,一直堅守專業,期間特首都換咗四任,佢哋都經歷咗當中風風雨雨,起起落落,「事實上,綜合性周刊摺完一間又一間,惟有《東周刊》屹立不倒」。
點解屹立不倒咁巴閉?《東周刊》話嘞,「正因為有公信力,報道真實新聞,所以才得到讀者的認同及信任」。留意返,「讀者的認同及信任」呢幾粒字,特別地bold大,仲要間咗橫線,相信係想吸引大家注意。總結一句,該刊話喎,「未來,《東周刊》必更加鞭策自己,堅守本份,努力前進」,「堅守本份」四粒字同「讀者的認同及信任」,有同等嘅刊登「待遇」,呢次會唔會成功引起「好打得、唔輸得」嘅林鄭高度關注?
立會補選新聞,《蘋果》一網睇晒
http://bit.ly/appledaily1125