日本男星岡田將生雖然冇乜代表作,但靠佢個靚仔樣,就深得電視台同埋片商歡迎,job接job真係冇停手,好似最近趕拍同藤原龍也主演嘅連續劇《ST》外,新劇、電影排住隊出街,遲啲仲會進軍舞台劇界,喺新作《皆既食》度挑戰同志角色。
將生近年開始嘗試不同戲路,唔想局限只演花美男,所以佢喺擔演新片度有好多第一次,由於要反串扮女人,所以就試勻晒戴Bra、化濃妝、着高踭鞋,佢個嚇人女裝look已經曝光。
將生為今次新片,仲有一場拍住女主角廣末涼子嘅鋼管舞場面,佢哋事前花咗近3個月時間練習,夠晒專業。
呢套戲要11月至開畫,不過將生同廣末可謂合作無間,繼早前喺《律政狂人2》後,佢兩個都有為翻拍自作家東野圭吾嘅單元劇《劫持白銀》,同男主角渡邊謙喺雪地大鬥演技。