曼聯喺周二英超又喺主場失分，1:1逼和愛華頓之後，今季喺摩連奴領軍下踢咗16場英超主場比賽只係贏得6場，得勝率只係得37.5%，有機會刷新曼聯英超主場最低得勝率紀錄。

摩連奴喺今季強勢加盟曼聯，紅魔迷就好興奮，諗住會比之前兩位主帥莫耶斯同雲高爾好，點知踢咗大半季唔多對路，爭英超前四唔樂觀，仲要主場成績隨時跌破新低。今季前曼聯喺英超最低主場得勝率紀錄係13/14球季，19戰9勝得47.37%，但依家曼聯踢咗16場6勝得37.5%，如果今季餘下3場主場贏唔晒的話，就會刷新紀錄，衰到3場都贏唔到的話，仲會破埋73/74球季，曼聯頂級聯賽單季最低主場得勝率紀錄33.3%。