已有一年未有出過唱片的陳文媛，拍完青春劇《戀愛自由式》後，將在本月下旬推出新碟，並展開一連串宣傳活動，雖然BoBo人氣反彈，但畢竟她處於半新不舊之尷尬情況，年尾要在樂壇頒獎禮上分一杯羮，確實不容易。

「有代表作已開心」
BoBo對此也頗為認同，她說：「我嘅目標係有望攞到首金曲，有首代表作已經好開心，尷唔尷尬呢樣嘢，預咗啦，每個人都有唔同階段，我有首大家認為都好嘅歌就夠，我係未到女歌手獎項個位喎。」
BoBo續道：「我自己對今年攞獎嘅信心一半一半啦，上半年我用咗好多時間喺拍戲方面，自己有份攞獎就當bonus，冇份就下年再努力，但我唔會打定輸數，我係處女座，好執着，啲嘢起碼有九成半肯定至會話得㗎。」
廉署早前進行「舞影行動」，未知BoBo會否覺得日後的頒獎禮更公平？她說：「我唔知公唔公平，因為我唔知啲頒獎禮嘅機制係點，有呢件事之後，唔知啲人事、機制有冇改變，但出嚟嘅結果係會唔同，我唔覺以前嘅頒獎禮唔公平，因為每個攞獎嘅歌手一定有付出努力，有佢自己嘅價值喺度。」

「做好自己嘅崗位」
「舞影行動」為娛圈敲響警鐘，令不少人不敢胡作非為，對此BoBo說：「有冇呢個行動都好，我有自己做人嘅宗旨，做嘢嘅時候，要盡力做好自己嘅崗位，唔好為自己嘅利益傷害人。」