廣州豪宅向來集中二沙島同白雲區南湖邊，但坐落喺天河區，毗鄰華南理工學校嘅滙景新城嘅洋房，派頭原來都有番咁上下。首期共有一百間洋房，面積約三千七至過萬呎，每間售價七百五十萬至二千萬元人民幣，除咗屋大外，內櫳重好豪華㖭！
呢一百間洋房，每間連地庫共三層，有六成內置電梯貫通，小朋友同老人家唔使經旋轉樓梯上落，安全得多，的確住得矜貴。每部電梯價值十五萬至十八萬。
此外，地庫有特大浴室，既可浸Spa，又有桑拿同蒸氣浴房，重設家庭影院，享受一流。香港能夠拍得住嘅豪宅，相信都唔會太多，單係內置電梯呢項設施，十隻手指數得齊。

信和搵歌星旺場
信和集團早前搞「信和商場禮貌店員選舉」，已經完結，總共收到二十四萬張選票，反應好熱烈。究竟邊個可以攞到獎？今個禮拜六揭盅。信和重喺大角嘴奧海城商場搞頒獎，乘機宣傳一吓，同場重請到青春派歌手麥浚龍同關心妍做表演嘉賓。有明星助陣，可帶旺個場，啲租客就開心啲。

福田樓有免費睇樓團
代理為咗招攬客戶，真係乜嘢法寶都出齊，深圳福田嘅天健世紀花園，代理泛城（中國）就出到免費睇樓團呢招。今個周末組團到深圳實地睇樓，等啲客唔使擔心隔山買牛。
據泛城（中國）講，諗到搞免費睇樓團，係因為樓盤上周嚟港展銷時，好多客都話想實地睇過先買樓。唔知個團會唔會包埋食飯呢？
天健世紀花園共建三幢小高層及五幢高層住宅大廈，提供七百六十九戶，面積五百六至二千八百幾呎，預計後年五月入伙。