超人講過，喺香港搞私有化好難，如果要成功，最緊要冇得罪人，因為會俾人搞。睇返過去幾年，真係有好多單私有化都俾人（或者係小股東）「搞禍」。於是，噚日佢就親自示範畀大家睇，佢老人家係冇同人結怨，冇仇家，冇俾人搞，又或者係冇人敢搞佢，私有化？easyjob啦!
和電（2332）噚日朝早舉行EGM，為阿媽和黃（013）用每股2.2港紙私有化佢哋單嘢投票。雖然講明下晝收市後先公佈結果，但係和黃大班霍建寧晨咁早已經畀晒signal大家，單嘢一定過硬！睇佢行入會場嗰陣輕輕鬆鬆，開完會出嚟仲特登企定定畀記者任影佢春風得意個樣，先係高舉手指公擺個「冧巴溫」嘅pose，再嚟就係「港女上身」整個「V字」風騷一下，好明顯就係得咗啦！
Well……其實今次私有化都冇咩難度，事關和電07年同08年分別派咗兩次息，前後兩次加埋每股收13.75元，都咪話唔和味！正如小股東話齋，收購價好合理，反正和電手頭上賺錢嘅業務都賣鬼晒啦，唔私有化都唔知仲有咩用，你話係咪？

股東會眾生相　散戶搶食鬧高層

紅磡嗰邊和電股東會一片「河蟹」，但響小股東「維權」意識日漲下，中環同金鐘呢邊嘅股東會氣氛就有少少緊張！話說朝早中移動（941）股東會，有小股東姐姐投訴佢哋本年報太大塞爆咗佢個信箱，希望中移第日環保啲。至於金鷹商貿（3308）嗰邊，有小股東食點心食到連人哋文華啲杯碟都想拎走，被侍應開聲制止。下晝騰訊（700）個公關話明馬化騰唔見人，但好多行家仍然唔放心特登去萬豪巡一巡，果然畀大家見到小馬哥嘅Twins……唔好亂諗，我哋講緊佢對招牌企鵝Q哥哥Q妹妹咋！尾站嘅聯通（762）股東會，舊年班小股東投訴唔夠嘢食，今年佢哋一樣投訴唔夠嘢食。唔通佢哋唔滿意聯通股價，諗住拎多啲嘢食補番數？

匹克睇死李寧　遲早俾安踏爬頭

內地體育用品市場潛力驚人，有錢搵嘞，自然爭崩頭啦！咁究竟邊個至係一哥？匹克（1968）主席許志華分析，認為家嘅「一哥」李寧（2331），俾「二佬」安踏（2020）超越係遲早嘅事。好似早排李寧同安踏爭2012倫敦奧運中國隊嘅贊助咁，作為李寧手下嘅管理團隊，出價都唔敢去到咁盡，咪就係咁，俾安踏截咗糊囉。其實使乜許老闆講呀，幾間體育服裝用品公司嘅老總，得李寧一條友係運動員，好話唔好聽，隨時要standby應酬國家畀佢嘅重要任務。

李華華
mailto:[email protected]