徐淑敏（Suki）和黃浩（Kenny）婚後連生三女，組織幸福五口之家，Kenny近日還送老婆約值3,000萬貝沙灣豪宅，他們都明白幸福非必然，有能力都會關心社會。一直是懲教署懲教助理總會名譽會長的Kenny，前日獲懲教署署長邱子昭安排，到位於葵涌的勵敬懲教所參觀，該懲教所主要收容14至21歲的女囚犯，Suki亦有同行。
Suki和Kenny更跟幾位年輕女囚犯交談，了解她們犯事情況，她們都知錯，並承諾改過自新，Suki兩公婆聽到她們的經歷都感動到眼濕濕，兩人更試了囚犯在懲教所內學到的烹飪技巧所炮製的午餐，大讚好味。Suki昨日在電話中說：「今次經驗好難得，參觀咗佢哋住同埋學嘢嘅地方，佢哋煮嘢好有水準，睇到佢哋有好強嘅心去學習，想改過，同埋準備出番嚟工作。」

家教囡囡毒禍

對於囚犯大多因為涉及毒品被捕，Suki說：「署長話佢哋都係識咗啲男仔被𠱁食毒品或帶毒品。」身為三女之母的Suki尤其擔心，前晚回家即跟5歲多長女Vianna做分享，Suki勸喻囡囡將來切勿以身試法：「我哋傾咗好耐，佢可能好眼淺，傾到喊，我諗呢次對佢印象好深，我覺得要早啲灌輸小朋友毒品嘅禍害。」Suki還叮嚀Vianna要幫手照顧兩個妹妹，慎防行差踏錯。
至於Kenny則希望社會多接納更生人士，他昨說：「佢哋冇浪費光陰，反而積極進修各項課程提升自己，勇於面對過錯，仲訂下重新做人目標。人誰無過，希望社會唔好歧視更生人士，畀機會佢哋重投社會。」Kenny還把貼相到facebook鼓勵。
採訪：陳杰