曼聯前鋒尹佩斯相信佢喺奧脫福已經沒晒前途！點解咁講呢？原來係因為紅魔鬼仲未同剩返一年半合約嘅RVP傾續約，令呢位荷蘭國家隊隊長開始為自己打算。如果曼聯真係唔打算同尹佩斯續約，意味球隊喺今季之後好有可能嘗試賣走佢，咁就唔使一毫子都攞唔返，加上如果RVP完成佢當初同紅魔鬼所簽嘅四年合約，曼聯係要畀1,000萬鎊（1.17億）約滿酬金，所以有傳球隊到依家都仲諗緊係咪要同佢續約。RVP喺2012年加盟曼聯後，只係得第一季射入30球，上季入球數字已經跌到18，今季暫時更加只係得八球。