當年今日
關於我們

【BrandStory】廿年前矽谷 推家用router創先河!Netgear創辦人:成功靠「7條天線」當包裝

蘋果日報 2019/12/22 00:00

NetgearBrandStory

「啲…嘟嘟嘟…」,先將Modem(數據機)接駁電話線,再用龜速56K上網,此80後的集體痛苦回憶,一路直到router(路由器)開始普及後,才告終結。不過,又有多少人知道,將router帶入家居,令人人可室內使用無線wifi,有一個香港人功不可沒——盧昭信(Patrick)。盧昭信1976年從華仁書院畢業後,手持獎學金負笈美國,至1996年一手創辦主打家用router的Netgear,最終成功憑一條天線殺出條血路,更於2003年Nasdaq上市,建立百億上市企業。
互聯網1.0的時代
當時空仍在九十年代尾,一間叫Netscape的公司推出以畫面行先的瀏覽器(Browser),毋須輸入指令(command)就可連接互聯網。一推出即大受歡迎,連賺錢模式都未有就已經成功上市,網路世界迎來一波機會。當時未夠40歲的盧昭信,由Netscape的成功,看到無限可能;加上當時在惠普(Hewlett-Packard)打工多年,已經到意興闌珊階段,於是毅然放棄做「哎呀管理層」,放手一博出去闖,成立Netgear,決心要設計出一個家用router。
家用router得啖笑?
當年,思科(Cisco)千辛萬苦,才可砌出一個大型而複雜的商用router,Patrick Lo將家用router的概念推銷給投資者,怎知遇到第一個反應是閉門羹。「我好記得拎個concept去籌錢嘅時候,個個都笑到趴喺度。」盧昭信笑說,當時投資者直指「你有冇搞錯呀,大家都知設定一個Cisco嘅router需要幾多IT知識,你唔係諗住啲人可以自己搞得掂?你唔好問我哋攞錢。」
不過做硬件出身,畢業於Brown University電子工程學系的Patrick Lo,很快就克服技術問題,透過做示範,顯示普通人都能輕易成功安裝,「當然亦都有人唔信啦,但好彩自己喺矽谷有啲人脈,其中一個叫Bay Networks公司就好buy家用router呢個idea。」
一條天線的轉捩點
雖然是家用router的市場先驅,但沒有令NETGEAR一炮而紅,盧昭信發現,縱然有好技術,但缺乏營銷也是徒然,「如果你想喺retail賣,但冇一個大家都認同嘅特點,你就變咗鬥價錢,死硬。」技術要講出來,長如寫論文,但客人肯花一分鐘去閱讀包裝,已經是極限。
於是他又度到條橋,將高深難明的技術,變成睇得見。「我哋嘅秘密就係將外置實體天線放在機芯,但客人唔知,點信你呢?於是我哋將機芯7條天線,都裝了一個LED燈,當電腦接到其中一條天線,盞燈會著。」結果令客人留下深刻印象,盧昭信憶述,當時這個名為RangeMax的router為NETGEAR打響名堂,「我仲好記得客人唔太識我哋咩牌子,但行入舖頭就問,有冇閃吓閃吓嗰隻」自此NETGEAR在美國市場佔有率一直向上升,走向一條高端路線,產品定價數千元計。
永遠活在危機中
高峯時期,NETGEAR市值上到20億美元,折合156億港元。不過router市場競爭大,連Google及Amazon都加入競爭第六代WiFi市場,加上中低端牌子以低廉價錢搶佔大部份市場。根據彭博數據,2018年NETGEAR市佔率只有6%,股價近期更大跌近半。
Patrick Lo則強調不會鬥價錢,亦指出NETGEAR市場定位注定佔有率不會高,最終賺錢能力靠的是品牌及質素,「無論是intel或Broadcom的晶片,都會先與我們合作,有技術保證」。
對於近年中美貿易戰,令美國做高科技同時有硬件的公司都要捱25%關稅。但輕資產,沒有工廠的NETGEAR迅速將生產線搬到越南、泰國及印尼等地,成功避過一劫。
記者:朱得志
影片:
採訪、編撰 / 朱得志
攝影 / 健次 家均
剪接、後期 / 康耀允
編審 / 倪敏慧
investMAN
For People of Style & Substance
掌握理財智慧 感受生活品味
http://investMAN.hk
empty
盧昭信(Patrick)1976年從華仁書院畢業後,持獎學金負笈美國,至1996年一手創辦主打家用router的Netgear
empty
RangeMax為NETGEAR打響名堂