【今日派餅】Jessica@SG影婚紗相 爆未婚夫煩過女人
蘋果日報 2019/09/24 15:15
Super Girls婚紗相Jessica蔡明思
女子組合Super Girls成員蔡明思（Jessica）今年4月與拍拖6年圈外男友Steven訂婚，下月27日在台北舉行婚宴。Jessica今日派嫁女餅，內附一對準新人的婚照明信片，卡上印有二人英文名縮寫「JS」的logo，她說：「之前去咗日本米子市影以大自然為主題嘅婚紗相，總共帶咗3套婚紗過去。」
其中在沙灘上拍攝的一襲婚紗為露背開胸設計，頗為性感，她笑言未婚夫沒有下禁性感令，正式婚禮當天穿的婚紗是Deep V款，亦相當性感︰「我都有問佢係咪ok，可能長輩傳統未必太鍾意。佢就話我覺得好就着，唔使諗咁多。」雖然未婚夫對婚紗無要求，但Jessica帶笑爆料：「影婚紗相嗰日，佢煩過女人，成日都好chok，連攝影師都頂唔順，成日笑佢『得㗎喇！可以出道』。因為佢對自己影嘅相好有要求，攝影師只係影緊我，佢都不斷喺旁邊擺pose，攝影師唔好意思唔理佢，走埋去同佢影幾張相。」
Jessica更埋怨男友過於緊張拍攝效果關係，影響到她當日累得不想再繼續拍攝，她說︰「佢有好多idea，畀好多參考圖攝影師睇，樂在其中，比女仔要求更多，影到我好攰，我同佢講唔好再影，佢就會話『我人生得一次，你好好配合我啦』，反而係男仔咁同女仔講，都幾好笑。」
Jessica帶了3套婚紗去日本。
Jessica爆未婚夫煩過女人。
Jessica和Steven下月在台北擺酒。
Jessica今日開始派嫁女餅。