特首林鄭今日（11日）喺記者會上講到話，疫情至今一共開咗500場以上嘅記者會，仲話每月都要寫「抗疫報告」交代最新疫情狀況，似乎又想讚自己抗疫勞苦功高咁。不過，縱觀咁多場記者會，八方就覺得啲高官有冇戴「銅芯抗疫口罩」就最值得留意喇。

早喺6月份嗰陣，林鄭就試過個「銅芯口罩」鬆脫，中途要換過個口罩，仲解釋話「洗得多，鬆咗」。不過睇返今日嘅記者會，除咗林鄭之外，得勞工及福利局局長羅致光同民政事務局長徐英偉戴咗「銅芯口罩」，而公務員事務局局長聶德權、食物及衞生局局長陳肇始、衞生署署長陳漢儀、醫管局行政總裁高拔陞就無跟大隊。

講起口罩又令人諗起，陳肇始早前喺記者會上，被傳媒發現將口罩反轉咗戴，今日佢就冇戴錯啦，不過就喺記者會上咳咗幾下，仲用紙巾抹眼淚，似乎有啲唔舒服咁，搞到發緊言嘅聶德權都嚇一嚇；但坐喺陳局長隔離嘅羅致光就好淡定，淡定到喺成個記者會上齋坐喺度兩個鐘。不過佢一啲都唔寂寞，因為徐英偉同高拔陞都係齋坐，成個記者會都冇出過一句聲。

疫情咁嚴重，八方都想呼籲一下各位要戴「好」口罩，有唔舒服就要留喺屋企休息，仲要避免出席不必要嘅聚會啦！

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！