香港人從小吃到大的生命麵包，近日成了熱話。

11月21日，香港警察開咪向理大留守的抗爭者挑釁：「你哋就食生命麵包，冰冰冷冷嘅生命麵包，我哋收工後上深圳食海底撈，飲冰凍啤酒。」此話一出，掀起極大迴響，有指警察貶低生命麵包的價值，牽起港人回顧嘉頓陪伴幾代香港人甘苦與共的故事。

嘉頓新抱、領賢慈善基金創辦人張王幼倫不願公開評論現時的香港局勢，但她寄語大家和平，並對未來充滿信心，堅持不會離開香港。張王幼倫早前為領賢在港舉辦一年一度的慈善晚宴，今年的主題是「Stars In Harmony」，以和平為主題，她說：「我覺得和平好重要！佢對於生活嘅大小事都畀大家正能量同動力，而一個和平嘅社會，大家接受良好嘅教育，團結一致，可以促進社會更快同埋更好嘅發展。」張王幼倫指領賢的宗旨是將生活與藝術融合，今年的晚宴，她與藝術家Nicholas合作，放置了60多隻和平鴿，目標是大家團結一致，她說：「和平鴿係世界和平嘅象徵，嗰晚掛咗60幾隻和平鴿，佢係一件藝術品嚟，個意義好好，現場望落好似團結一致，向同一方向飛行，佢係用特別光線反射嘅物料造成，視覺上唔只好靚好耀眼，可以令每個人都被背後嘅意義所感染，感受到振奮同鼓舞，我希望個個都得到正能量。」

過去5個多月，香港經歷了一場前所未有的抗爭運動，在這個艱難時刻，會希望香港可以和平解決？張王幼倫說：「我諗唔只香港啦！近呢幾年睇新聞，世界各地都有好多社會動盪，所以呢個主題唔係單為咗今年，係一個訊息，大家都啱用。」張太熱愛香港，到目前為止也未曾想過離開：「我係香港土生土長，喺外國讀過幾年書，但係我覺得呢個係我個家，點樣都唔走，我嘅事業一路喺呢度，我一定會繼續發展落去，因為我相信明天會更好，我一定有呢個信念，因為我嘅性格係唔鍾意放棄。」張王幼倫與嘉頓家族第三代後人、外科醫生張力正結婚30多年，育有兩女一子，對於香港的前景，一家均有着同樣的信念，她說：「好得意，我3個細路由10幾歲就開始出去寄宿學校，大學喺出面，個個都返番嚟香港做嘢，somehow好似呢個家永遠都冇斷絕過，所以對香港嘅感情都經得起考驗，大家都冇人話要走，始終大家都喺度工作，亦希望事情會有好轉。所謂經得過考驗就係，現時咁擾攘嘅社會動盪、而家咁嘅時勢，我希望大家做好自己本份，我相信有好嘅明天！」

張王幼倫將3子女培育成尖子，兩個劍橋、一個倫敦大學畢業，現已踏足社會，作為母親是否可鬆一口氣？張王幼倫說：「唔可以話佢哋叻，我揸住兩點，第1係做任何時都要有熱誠，鍾意做一樣嘢，畀心機去做，好嘢自然會嚟；第2就係，無論你幾有天份都好，做人一定要努力，因為實在好多人都有天份，但係決定你能唔能夠成功，就係嗰份堅持。所有做家長嘅，小朋友咩階段都想知道佢做梗乜，同埋要保持住同佢哋溝通，大家冇嘢傾、冇嘢講係一個危機，我成日話畀佢哋聽我好似佢哋嘅好朋友，但實際上我係呀媽。」她又謂已隨時ready子女組織家庭，期望他們找到了解自己的伴侶，做個有用的人，貢獻社會。

採訪：羅慧敏
攝影：沈健程
攝錄：馮嘉銘
場地提供：SEVVA

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此