馬德里體育會前鋒基沙文嘅轉會連續劇以續約留隊收場，過程可能已經玩謝唔少曼聯球迷，原來呢位26歲法國射手連結婚都殺傳媒一個措手不及！法新社周五報道，基沙文同拍拖多年、育有一歲囡囡嘅女友Erika Choperena周四下晝已經低調地喺西班牙歷史城鎮Palacio de Galiana拉埋天窗，出席嘉賓亦只有馬體會隊友桑法蘭、佐治高基、加美路同法國隊友烏姆迪迪等。

基沙文嘅低調確係冇花冇假，只有Erika喺ig上載一張戒指相，簡單一句「Just Married」已經夠晒窩心！而喺基沙文嘅社交網站，只有一段佢將頭髮highlight成藍色嘅短片同相，髮型顏色激到連巴塞隆拿前鋒尼馬都要留言恥笑！