近日無綫同四大唱片公司因為歌曲版稅問題反面，搞到呢幾間唱片公司嘅歌手暫時都唔可以亮相無綫，結果前晚平安夜同踏入凌晨聖誕節，無綫同商場合辦喺沙田搞嘅倒數活動，現場出席歌手寥寥可數，只有草蜢、江若琳、Square同冼色麗，其他就只有處境劇《畢打自己人》嘅演員鄭欣宜、徐榮同陳茵媺等，另外仲有無綫藝員陳美詩、周美欣同陳爽。

環球尋求法律意見

當晚由草蜢擔任倒數時段嘅表演嘉賓，佢哋一口氣唱咗5首歌，不過其中3首包括《寶貝對不起》、《忘情森巴舞》以及《失戀》都係寶麗金年代，即係家嘅環球，咁版權會唔會屬於環球呢？蔡一智被問起呢件事時都一頭霧水話：「嗰3首歌都係改編歌，況且係商場邀請我哋演出，啲歌係我哋揀，加上我哋啱啱喺外地返嚟，所以都唔知實際情況係點。」
環球高層黃劍濤噚日表示：「我冇睇到個節目，係朋友話我知，呢幾首歌版權係屬於我哋，所以原則上係唔可以播出街，不過我都要再了解一下同尋求法律意見先。」無綫製作部總監何麗全就話歌曲有唔同版權同錄音環境，佢哋都要因應唔同情況處理。不過無論點，草蜢當晚出場時反應相當熱烈，三個仲唱到一身汗，佢哋覺得有好表現畀觀眾睇先係最緊要。