【遭上海總會歧視】張寶華再轟回覆令人失望：索性閂門唔好做生意啦
蘋果日報 2020/03/03 18:06
歧視黎芷珊張寶華上海總會
張寶華原定明晚在上海總會為「生死之交」黎芷珊慶祝生日，但最終由於她們上過疫輪而被取消訂枱。身為該總會會員的張寶華，今日在社交網點名批評上海總會之餘，亦公開和經理整個WhatsApp對話過程截圖，不忿被無理歧視。事後張寶華接受《蘋果》電話訪問時，坦言由今早接獲被取消訂房時，已即時致電上海總會了解狀況，但職員接聽表示要轉交經理聽後，最終張寶華等到斷線仍未有人接聽。
她無奈地說：「其實到現在我都一頭霧水，真心想問佢哋幾個問題，第一：我本身係會員，咁係咪以後唔使再嚟幫襯，第二：係咪所有大陸同胞你哋都唔會接待？第三：警察有人確診，係咪所有警察都唔歡迎？」除了滿頭疑問，張寶華亦炮轟上海總會做法不科學，十足「盲毛」一樣。「何栢良醫生已經講咗只需要醫學監察14日，我除咗返工外，已經差不多40日冇出去食飯，唔明點解佢哋咁驚，其實驚就索性閂門唔好做生意，因為事實證明有人係冇病徵但依然被感染，佢哋根本防不勝防。」
直至今日下午約4時，張寶華向《蘋果》透露終收到上海總會的回覆，但所得的答案卻令她感到十分失望。她說：「我問佢我可以幾時嚟，佢答唔到，我問如果有大陸客人嚟，你哋會唔會歡迎佢哋幫襯？佢答唔到，我再問警察有人中招，如果警司嚟食飯，你哋會唔會畀佢嚟？佢同樣答唔到，不過佢畀我嘅回覆，竟然係話因為我同芷珊之前俾人公開過上船，好多人認得我哋，其他人因為冇公開過名，所以冇問題，咁即係歧視啦！佢仲同我講『張小姐，呢個時間咁敏感，你明㗎啦！』我唔明，我只係覺得有啲暈！」她坦言整件事本身可以圓滿去解決，但現在對方卻選擇了一個十分愚蠢的做法。
《果GYM》隨身播 健身壹App過！
（IG圖片）
張寶華和陶傑曾乘坐疫輪，完成自我隔離後，前者卻遭到上海總會歧視，不獲接待。（IG圖片）
張寶華原定明晚為芷珊在上海總會慶祝生日，現在卻要另覓地方。（IG圖片）
張寶華透露自己10年前已是該會會員，和該總會的伙計十分熟稔，但現時會否再幫襯仍是未知之數。（IG圖片）