有「股壇狙擊手」之稱嘅「大劉」劉鑾雄，一係唔出手，一出手真係隨時嚇親大家，佢原來手持84.74億港元市值嘅平安保險（2318）股份！
聯交所股權變動資料顯示，佢喺上個禮拜四，用咗2.2億元（每股平均價64.56元），喺場內勁掃340萬股平保，令到持股量由1.27億股增加到1.31億股，佔H股嘅比例亦由4.99%升至5.12%，如果唔係因為持股超過5%，真係冇乜人知原來大劉睇中中資保險股，今後佢要買要賣，都唔可以再低調行事，走唔過大眾嘅精明眼喇！

高位掃貨　叠水

計落條數，大劉係繼滙豐控股（005）之後，成為平保H股嘅第二大股東；計埋啲A股在內，大劉嘅持股量都佔成間平保嘅1.78%，唔算係細數，大嗱嗱攞成兩億出嚟，仲喺平保股價高位增持（最高價66.5元），可見大劉幾「叠水」。
雖然大劉曾經有「股壇狙擊手」嘅稱號，但係觀乎其近年嘅投資活動，似乎都冇乜破壞性行動，啲公司仲係好健在，好似海油化學（3983）、英皇國際（163）等。大劉以前高價沽貨，再喺市場低位掃入，藉以掌握控制權，但係佢近期試過高位買入首創置業（2868），然後喺低位沽出，可見狙擊手之稱號或已不合時宜。

TCI增持　懶理

與此同時，由大劉做主席嘅華置（127），近期連番被TCI進取增持，市場擔心佢哋會成為TCI嘅「點心」，不過，大劉喺呢個時候，仲有閒情同資金買其他公司，似乎TCI對佢嚟講，真係冇乜威脅。
[email protected]