呢一排寧舍多嘢講嘅曼聯領隊摩連奴，禮拜二晚喺球隊主場逼和般尼2:2之後繼續發功，除咗呻曼城多錢過紅魔鬼之外，仲四周圍辣火頭，一次過寸勻阿仙奴、車路士同熱刺三隊。

摩佬首先話：「當我哋講到曼聯嘅時候，你以為AC米蘭、皇家馬德里同國際米蘭唔夠我哋咁大咩？呢個世界有好多大球會。但當你講到贏英超嘅責任時，熱刺係無呢樣嘢㗎，因為佢哋無我哋呢種歷史。阿仙奴都無呢種責任，車路士亦都係一樣。我哋已經連續兩年嘗試去重建一支球隊，大家都清楚明白呢隊波唔係世界上最好嘅一隊波，曼城用埋前鋒嘅價錢嚟買隻閘，所以當你講大球會嘅時候，係要睇佢哋嘅歷史。」

翻查紀錄，曼城領隊哥迪奧拿上任之後總共使咗3.61億鎊（約38億港元），摩佬自己都使咗2.86億鎊（約30億港元）買七個球員，但佢仍然認為唔夠錢同曼城爭。摩佬話：「根本就唔夠，完全唔夠，仲有喎，大球會要畀嘅錢永遠都同其他球隊唔同，所以大球會往往係會因為悠久嘅歷史而喺轉會市場受到懲罰。」

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM