準靚媽官恩娜（Ella）早幾年喺《美女廚房》煮出一碟有尿味嘅椒鹽瀨尿蝦而獲封「地獄廚神」，震「驚」娛樂圈，不過Ella自從早前宣布懷孕後，除咗間中出席活動外，其餘時間都安胎及鑽研廚藝。

繼日前佢煮咗味三椒炒牛肉後成功洗底後，今日佢又喺網上晒廚藝，炮製一味家常菜式豆角炒牛肉，佢仲有感而發打咗段文。

Ella自嘲根本係一個男人：「對大部份人都識整嘅菜式，我都好唔容易先整好，點解細個唔留意下屋企人係點煮野食呢？可能我踩得太多單車…仲有同阿哥打得太多交，除左化妝叻d（啲）同有一把呃得下人嘅長髮加上比較感情豐富…我根本係一個男人?無論如何，喺整呢碟豆角炒牛肉嘅時候，心裡面突然有一絲絲好幸福嘅感覺，唔知係咪BéBéG喺肚裏面聞到都覺得正呢！？#以寶寶幸福為大前提而學煮送嘅大肚婆」