擁有韓國男團JYJ嘅C-JeS事務所，近日認真黑仔，事關JYJ成員朴有天上月捲入性侵疑雲，噚日朴有天喺事件爆出後首次到警署受查，當大家嘅注意力都集中喺朴有天身上時，原來朴有天所屬嘅C-JeS上月被韓國國稅廳進行稅務調查。

據知今次係C-JeS第一次受到國稅廳嘅調查，調查主要集中喺C-JeS納稅情況，同埋審查JYJ海外演出有冇涉嫌逃稅。

由於C-JeS出名唔會跟旗下藝人簽合約，單講個信字，所以亦都為調查帶來不利因素，而C-JeS方面就話：「上月頭接受國稅廳嘅稅務調查，現時進入尾聲，同國稅廳平日嘅稅務調查冇乜分別，我哋會全力配合調查工作。」