喺啱啱過去嘅星期六自訂車牌拍賣會上,出現咗兩個蠱惑車牌,一個係「19B0Y」,一個係「USH0」。喺現場嘅讀者Ronald同八方講,前者疑似廣東話粗口「濕X仔」,後者好似洋人罵人"Youasshole"。但由於自訂車牌唔准有英文字I、O、Q,以免混淆數目字1同0,所以拍賣官讀出個牌時,只係講1、9、B、0(零)、Y,台下冇人識笑。
運輸署資料顯示,「19B0Y」喺拍賣會上未能售出,所以收特別費用5,000蚊分配番畀申請人。「USH0」就有人用底價5,000蚊投到,冇人爭,極可能係申請人自己投番。Ronald話:「市民申請自訂車牌時,運輸署呢樣唔得,嗰樣唔得,但粗口車牌竟然都得。」
不過,優質幸運車牌中心董事顏文翰話:「真係各花入各眼,係咪粗口睇你個腦平時諗乜嘢。」佢話,呢兩個車牌只算踩界,「19B0Y」可以係19歲仔,「USH0」可以係姓何人士嘅英文名縮寫。反而佢接過一宗更明目張膽嘅個案,「有個後生仔客叫我幫佢申請自訂車牌『0N99』,我話實唔批,佢都要試。」最終運輸署真係話個牌品味低俗,唔批。
顏生話,其實大部份車主都唔會申請粗口諧音車牌,以免有失身份,「而且掛喺架車度,咪好似鬧自己係『濕X仔』?」佢又話,近排經濟好番啲,除咗自訂車牌,傳統車牌生意都幾好,佢最近有個「AA8XX」賣咗成十幾萬,比上次AA牌貴五成。