開季前特別多馬匹試閘，星期五（28號）朝早又有四組泥閘安排好，跟手禮拜六沙田馬場季前嘉年華，再會有幾組草地試閘進行。
剛周三早上四組泥地試閘，清一色由胡森旗下馬勝出，禮拜五呢鋪睇嚟佢又想攞威。呢位全港養馬最少之練馬師共派五駒出試，包括第一組「風采」、第二組「友歡笑」、第三組「紅褲仔」、「紅旋風」及「歡欣滿載」，其中「紅褲仔」卜定由13屆冠軍韋達主試，人馬上季合作四戰兩W兩P全上名，正正就係此駒上季頭四場成績。咁嘅操練部署，好明顯幕後係想用番呢個配搭於季初搶攻，矛頭九成九指向9月13號今季首場四班泥地1200米。