當年今日
關於我們

【Mandy Lieu愛將】文雪兒大女張筠入行做model 圓渾性感身材改寫「瘦規則」

蘋果日報 2020/08/28 17:45

文雪兒大女張筠土木工程星二代

現年60歲的前佳視及亞視花旦文雪兒(本名張惠英)於90年代淡出幕前從商開美甲店,近年就戲癮起重返視圈為大台拍劇,連她的27歲大女張筠(Christy)亦入行做模特兒,被洗米華舊愛Mandy Lieu的模特兒公司QUEST睇中,簽約入行。
Christy外貌有點似韓劇《夫妻的世界》中「最靚小三」韓素希,身高大概5呎6,笑容甜美,體形屬健康線條類型,在她的IG賬戶,全是她行山做運動的相,亦有性感造型的KOL工作作品。她更是冷門運動閃避球的香港代表隊成員,喜愛健康生活,如日前她接受《蘋果》專訪時,就提議去鶴咀海岸保護區行山,享受大自然的寧靜及可以伸展做運動。她的中文名叫張筠,因同音的關係,自小花名「將軍」,她在英國UCL(倫敦大學學院)大學土木工程碩士畢業後,在倫敦曾參與過希斯路機場擴建項目,現忙於香港一個主題公園項目,笑言工作可以看到不同的香港。
提到大學時主修土木工程,Christy表示這個科目是男性主導,當年她的班中有70人,連同她只得3個女同學:「主要自己鍾意數學,同埋可以周圍行吓,呢份工就好適合我,自己鍾意做地盤,加上爸爸都係呢個背景。今年會好努力試吓考土木工程師牌,呢行女性係少數,做得唔好,好易俾人發覺,我公司啲人比較照顧我,我做咗4年幾都好開心,地盤嘅人都好包容我。」已有一份收入穩定的專業人士工作,為何會有意嘗試做模特兒?Christy簡單地說:「趁後生可以體驗多啲,經歷多啲,知道自己真正鍾意做啲咩,幾個月前有呢個機會,我覺得試完爸爸工作體驗,而家試媽媽呢邊,我細細個比較鍾意表演,不妨試吓。」
媽媽是資深的電視藝人,Christy笑言她的作品全部都有看過,如有機會亦想與她合作:「有睇佢《對對糊》、《甜甜廿四味》劇集,知佢以前有拍戲。當然想同媽咪合作,有一個前輩可以指導吓我點做,最鍾意佢後生時喺《對對糊》做一個叫『咖喱雞』 角色,比較古靈精怪生鬼,佢係第一個女性嘅韋小寶,佢會女扮男裝。」
文雪兒復出的電視劇,她多數飾演一些怕事的媽媽角色,與現實中Christy心目中的形象截然不同,皆因她曾經歷過離婚要母兼父職,做埋爸爸嚴肅的一面:「現實都唔係,佢會堅強、強悍啲,係一個女強人,佢喺公司見到manage同事時好tough,表現出一種威嚴感覺。」問到她媽媽如何教導她,她說:「通常佢會講吓道理,唔聽係先籐條解決,我細個比較百厭,有一次喺電梯跳嚟跳去,媽咪就驚整到困升降機,到咗我哋層媽咪出咗去,我就繼續跳,真係困住咗。返到屋企,佢就同我講叫我唔應該咁樣,覺得我唔聽話。」
藝人之後多被冠以「星二代」之名,Christy表示不會因此感到壓力:「星二代都係一個稱呼,無好同壞。始終係會有少少對比,但我覺得ok,push到我更加努力更好。」入行做模特兒有迹可尋,文雪兒在她小時候帶她出活動走catwalk,令她自覺有表演慾。對於做模特兒的素質,她走健康路線,亦不會刻意節食減肥:「以前見嘅model係好高䠷好瘦好靚,行出嚟着件衫carry得好靚,可能而家形象健康啲,唔同size,cater唔同嘅model。我自己比較鍾意curvy少少,覺得咁樣係形象健康啲model,自己體質唔係好瘦嗰類,盡量操fit練線條,再努力練多啲muscle,自己好鍾意Coffee嘅身材。」
提到被指外貌有點似「最美小三」韓素希,她自言是一種讚美:「聽過有人講,自己有留意,有睇過套劇,某幾個角度似,佢而家係韓國最好,似佢唔係一件壞事。」入行做模特兒,Christy指性感底線會以健康及尊重客人為大前提,亦有興趣嘗試拍劇,更希望可以同媽媽合作,問到媽媽有否給她入行的小貼士,她說:「佢時常提醒我要真誠啲對人,你對人哋好,都希望人哋對你好,都想我帶多啲正能量畀人哋。」再問到最想和哪些藝人合作,Christy表示:「如果合作想揀彭于晏,佢嘅戲比較活潑好動,為角色操練,譬如打拳,佢操練到打拳,外形上男神類型,肌肉型,活潑陽光正能量。」
採訪:唐如
攝影:陳俊強
攝錄:馮嘉銘、廖達燊
empty
張筠今年入行,加入Mandy Lieu的模特兒公司。(蘋果日報)
empty
Christy正職做土木工程工作,現兼職嘗試做模特兒。(蘋果日報)
empty
Christy愛戶外活動,在港成日去行山,生活健康。(蘋果日報)
empty
模特兒都可以有好多種,Christy形象健康,希望練出肌肉有好線條。(蘋果日報)
empty
外貌被指似韓星韓素希,Christy覺得似明星不是壞事。(蘋果日報)
empty
Christy接的模特兒工作,不乏大賣健康性感造型。(IG圖片)
empty
於英國修讀土木工程畢業時,母親文雪兒飛到當地出席畢業禮。(受訪者提供圖片)
empty
畢業後在英國參與過倫敦希斯路機場擴建工程。(受訪者提供圖片)
empty
在英國讀書時,已愛上閃避球。(受訪者提供圖片)
empty
Christy回到香港玩閃避球,更因此運動整斷手指。(受訪者提供圖片)
empty
回港多年,Christy成為閃避球的香港隊代表。(受訪者提供圖片)
empty
文雪兒曾經歷婚姻失敗,要獨力照顧兩女。(受訪者提供圖片)
empty
文雪兒曾經歷婚姻失敗,要獨力照顧兩女。(受訪者提供圖片)
empty
Christy小時候已十分愛打扮。(受訪者提供圖片)
empty
張筠自小已愛上做模特兒,母親曾帶她去參加比賽。(資料圖片)
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於 《蘋果日報》你的優惠 網上獨家發售!