股市大起大落冇晒方向咁款，升跌幾百點平常事，波幅冇1,000點嘅話，散戶都冇乜感覺咯，舊年被譽為「亞洲股神」嘅四叔，重鎚出擊大手撈底都不幸要坐艇，佢大仔李家傑日前同老父唱反調叫人沽貨離場，搞到視四叔為「股神」嘅散戶無所適從，追揸沽毫無頭緒，八方畀個第一手消息大家，四叔今日終於露面！

四叔今日出席捐款2,000萬元畀浸會大學嘅儀式，其中1,000萬元會成立「當代中國研究所」，其餘一半用嚟推動校園國際化，股神今日會唔會再有「神話」預示股民，八方可能未夠誠心，暫時收唔到任何啓示，不過𠵱家市況反覆，四叔似乎都係少說為妙，雖則佢早前已經講明「輸咗唔好賴我」，不過賭仔姓賴，八方唔排除有人遷怒於四叔。
人人都等待「神的指示」，四叔有乜辦法唔講呢？八方認為佢聽日出席儀式前，最好先用漱口水囗吓口，免得開口夾着脷講錯嘢，仲要預先飲幾大杯水，份量視乎佢容量同忍耐能力，一有人問佢股市問題，佢就以生理需要為由，大條道理奉旨封口失陪先。股神借尿遁唔光彩，四叔不如玩鋪勁，唔講股市，宣佈08年搞多場世紀大喜事，好似當日子淇入門咁，花多一千幾百億幫香港冲喜，至於係乜喜事，可以係婚事、壽宴或者生日會，鍾意搞乜由佢老人家揸主意。
呢亭聲東擊西做法頂得一時頂唔到一世，如果股民怨憤真係好大，八方睇怕四叔最好都係面對現實，向一班聽佢指點，跟佢入貨嘅散戶講聲sorry囉，最好派啲清凉茶畀大家下火。八方唔係認同只係聽個冧巴就「盲舂舂」入市嘅股盲，但如果四叔出句聲可以令社會和諧啲，相信佢樂意咁做。

散戶近日血流成河，好多人慨嘆要上國金跳落嚟，排隊人龍見首不見尾，唔打尖都上唔到頂樓咁誇張，真係聽到都驚，四叔係國金大業主，為免小股民一時諗唔開，八方建議佢將《大時代》入面「股神心法」刻喺國金大門，「股票必勝法，貪心輸錢贏，輸血不輸錢，人人去輸血，殺人不打風，落雨去離島，離家飲煉奶，見人分遺產，出獄嫌錢腥，快樂冇人格，出家冇人工，攻而無不克，戰無不勝矣！」等小股民做儍事前睇吓，參透到「及早離去」呢個唯一取勝法，話唔定可以救番好多條命。