消費BestBuy:
印度披肩$88有交易
天氣反常,睇怕幾件皮草都要被判加刑繼續囚禁喺衣櫃,取而代之嘅係攜帶方便又保暖嘅披肩,就算未到冬天,女士們都總會戴番條,一來以防出入冷氣地方有得披一披,二來可以用嚟襯吓衫,如果你係後者咁就機不可失,事關由今日起一連十日會有印度披肩開倉,全以輕薄保暖見稱的高山羊毛(Pashmina)製成,今次低至二折起發售,平時一條價錢,𠵱家可以買兩、三條,趁平執番幾條襯衫,今個秋冬可以大玩Mix&Match。
記者:黃婉冰
攝影:陳盛臣
ImageGirl:ChoiYi、Yan MakeUp:Cherry Hair:Meg
CasualLook
羊毛線織花最簡約
潮流興3D,披肩款式都大玩立體花,用羊毛線拼砌出唔同圖案,效果比織花突出,加上豐富嘅顏色配搭,鍾意簡約又要夠起眼的話,呢款會係唔錯嘅選擇。
原價$1,080
開倉價$280
染繡花好細緻
論手工,呢條就最花工夫,通花部份全由人手挑成,扎染、繡花做得均勻細緻,綴以少量珠片,款式、手工別具心思。
原價$1,620
開倉價$350
淨色最易襯
咁多款式中淨色最啱OL,無他,顏色多多,超過三十種顏色任你揀,買幾條唔同色返屋企鍾意點襯都得,𠵱家開倉價$88有一條,買多幾條都唔覺肉痛。
原價$450
開倉價$88
斯文Look
銀片金線Sharp得高貴
同是披肩,但Pattern唔同,效果可以有好大分別,好似呢款用人手繡上銀片再配上金色線,Pattern雖簡單,但加上漸變色,披起效果有無印度西施Feel先?
原價$1,350
開倉價$350
雙面織花夠大方
雙面織花款式較為大方得體,用70%高山羊毛混30%真絲製成,所以披肩睇起嚟有少少似絲巾,但保暖程度同Pashmina無太大分別,雙面織花,鍾意點披點綁都咁斯文大方。
原價$1,060
開倉價$200
釘珠繡花有古典味
碎花代表百搭、易襯,基本上襯牛仔褲或裙都得,有少少細珠片作點綴,唔會過份花巧誇張,古典味中帶有少許民族Feel,款式較大路,最啱後生女。
原價$1,440
開倉價$350
專家教你分真假Pashmina
一轉季,Pashmina紛紛出籠,檔檔都大大個字話係真正Pashmina。唔識分真假,好易用正價買錯用人造纖維製成嘅假貨,為免得不償失,今日就搵修讀過兼從事紡織業嘅Alex教番兩、三招,咁就唔怕入錯貨!
招數一:摸質地
由於真正Pashmina係選用由高山羚羊身上自然脫落嘅茸毛製成,屬於動物纖維,所以摸上手質地會柔軟同輕薄,粗幼分布唔平均,用手指輕輕一刮就會變得疏落,再輕輕一掃又會變回原狀。
相反人造纖維(Acrylic、Viscose)較重身之外,質地粗幼一樣,纖維分布亦密得多,全無彈性可言。
招數二:戒指試柔軟度
如果係真貨,其質地柔軟得可以好暢順咁穿過戒指,較粗嘅人造纖維就未能做到。
招數三:一燒即知
真正嘅山羊毛用火燒,燒焦味會同燒頭髮嘅燒焦味一樣,只要燒一燒就知真定假。
教你綁披肩!
戴披肩唔難,但要披得靚就唔容易,如果唔識得因應披肩嘅Pattern而求其亂綁一餐,幾靚嘅款式都俾你糟蹋晒,唔想俾人笑你無Taste,都係先學一下點樣綁絲巾嘅竅門先!
漸變色綁法:
●整理打結部份便完成,呢種綁法可以清楚睇見披肩上由深至淺嘅顏色效果。
Venessa:「啲質地摸上手好滑,幾薄但幾暖,手工都唔差,咁嘅價錢都算抵,我諗我都會買嘅。」
Erica:「啲繡花手工同質料都唔錯,減到三百幾蚊價錢算OK,手工幾細緻,Pattern都唔錯,我都想買番條畀媽咪。」
加$5換真絲絲巾
顧客買滿$300加多$5或$10就可以換購真絲絲巾一條(價錢因應絲巾大小而定),加$10重可以幫你用個靚靚心形盒PACK成禮盒裝,送畀人絕唔失禮。
印度披肩開倉
地點:佐敦彌敦道219號莊士倫敦廣場地庫1B9舖(佐敦地鐵站C出口)
日期:即日起至10月12日
電話:34223956
營業時間:上午11時至晚上10時
付款方法:現金及信用卡(購滿$500或以上方可使用信用卡)