金像電影《樹大招風》道具領班張偉全，因管有22.3萬張拍戲時用的道具鈔票，被控保管偽製紙幣罪罪成，上月底判監4個月，緩刑兩年（相關新聞連結： https://bit.ly/2xztH5f），引起業界不滿。噚晚「香港電影工作者總會」發新聞稿，表示金管局已同意簡化申請程序，以及增加中文網頁申請渠道。（新聞連結： https://bit.ly/2MGeYbW ）

申請程序連結：　 https://bit.ly/2yo1FtM

香港電影工作者總會永遠榮譽會長吳思遠今日接受電話訪問，講到金管局嘅指引，佢直言「唔收貨」，指今次只係金管局意圖「補鑊」：「之前嘅規定，圈中人根本唔知嘅，我拉返道具判刑嚟講，甚至連中文指引都冇，依家先擒擒青整番個中文指引。」

吳思遠形容，電影係一個特殊行業，又用槍、用刀、又爆炸又撞車，「呢啲喺現實全部都犯法」，所以電影發展局同電影服務統籌科應該想一個折衷嘅方法，既可以保障電影順利拍攝，又唔會令拍攝者誤墮法網：「依家你夾硬攞個鈔票嚟話百分之二十（編按：金管局新指引要求道具鈔票面積必須比真鈔小或大20%以上），咁當然可以……咁拍出嚟（效果）點先？人哋會笑話囉！咪盡量唔拍、唔用囉。呢啲規定冇考慮電影特殊性。」

吳思遠提議可以以爆炸品處理作為藍本，印定一批不同嘅道具錢，要用就去借，同完歸還，要毀壞咪預先申請，唔使畀人睇到啲錢時大時細。其實金管局嘅措施係對付偽鈔，用嚟對付電影就好麻煩，吳思遠質疑：「咁你拍戲嘅手槍又唔可以同真槍一模一樣，要畀真槍大或者細大。」直指金管局做法擾民。

金管局聲稱曾有四部電影申請過用道具銀紙，因為某些理由被拒，吳思遠話：「其實佢哋一路都拒絕，今次係搵嚟講，傳媒應該問佢，既然話以前有咁多申請，有邊一部電影申請過？金管局將申請拍廣告、報紙廣告攞嗰啲當做申請。我依家要求，電影業拍咗咁多年戲、用過咁多道具銀紙，到底邊一部係你（金管局）批准嚟用嘅，你唔好話畀我聽冇紀錄，金管局根本喺度補鑊、喺度搪塞！」

最後，吳思遠仲引伸到拍戲用警察嘅委任證、口供紙、警車車牌全部都有機會被控告，但影界追求嘅係迫真同真實，電影先至好睇，佢話：「個原則佢哋冇搞清楚，香港唔拍警匪片就一啲事都冇，通唔通先？點解政府依家搞到咁，連港英時代都不如。我哋喺唔收貨嘅。」

精選娛聞，喺晒《娛果》：
http://fb.com/appledailyent