葡萄牙喺周三洲際國家盃4強輸畀智利無緣決賽，對陣中主力基斯坦奴朗拿度（C朗）嚟講梗係失望，不過人生又點止係足球場上嘅勝負，C朗證實啱啱又做爸爸，佢搵嘅代母已經誕下一對孖仔，而C朗亦獲葡萄牙批准提早離隊，唔使踢季軍戰。

C朗大仔小C朗已經7歲仔，佢亦係由C朗搵嘅代母所生，依家一下子變咗一家4口。C朗透過佢facebook透露：「之前我要為葡萄牙國家隊效力，一如以往我會獻出所有精神同力量去比賽，就算我知道我兩個仔剛剛出世都係咁話。可惜我哋唔能夠完成目標（洲際盃爭標），但我肯定會繼續為葡萄牙球迷帶嚟歡樂。感謝葡萄牙足總主席同國家隊教練嘅對待，我唔會忘記。好開心終於可以第一次見我嘅小朋友。」