純天然、無添加，今屆韻律操其中一個最吸引看點係南韓選手孫延在，以非常純情可愛嘅外表俘虜唔少男粉絲嘅心。孫延在煞食賣相背後實力都有番咁上下，喺上星期六倫奧韻律操個人全能決賽度幾乎攞牌；可惜喺棒操失手跌棒落地只係得第5，賽後難忍眼淚，真係我見猶憐。
年僅18歲嘅孫延在，6歲就開始練習韻律操，到兩年前入選國家隊，並且喺廣州亞運韻律操贏到銅牌。過去兩年喺南韓國內更加人氣急升，到今年首次喺世界舞台亮相，賽前已經受到高度注目，甚至有「韻律操金妍兒」嘅稱號；連喺香港都有唔少粉絲支持，全程實佢喺倫奧嘅表現。
今次孫延在出戰倫奧，都係抱住學習心態：「嚟倫敦嘅主要目的係學嘢，我最大弱點係國際賽經驗唔夠，呢度世界排名比我高嘅選手，都比我早至少3、4年接觸韻律操，我只算係初學者。」

體操界金妍兒錢途無限

孫延在喺初賽都出現過失手情況，喺資格賽棒操項目期間甩咗隻鞋，頂硬上當冇事發生，繼續比賽到尾；孫延在最終仍以第6名晉級，成為首位躋身奧運韻律操決賽嘅東亞選手。
到咗決賽又係棒操出事，孫延在喺圈操、球操同帶操表現都唔錯，3項都係排名3或4位；點知到棒操意外跌棒，令佢喺呢個項目只係排第9，總分111.475排第5，比銅牌得主只係少0.225分咋。知道自己錯失獎牌，孫延在都忍唔住喊咗出嚟。
南韓整容風氣盛行，不過據講孫延在係從未經過人工修飾。孫延在家係同金妍兒屬於同一家經理人公司，自然錢途無限，前者過去曾做過包括Fila同某衞生巾品牌嘅代言人。