當年今日
關於我們

艾阿恩爆冷踢走河床入決賽

蘋果日報 2018/12/20 05:20

足球艾阿恩世冠盃河床

世冠盃準決賽星期二晚爆出驚天大冷門,東道主阿聯酋球隊艾阿恩喺法定時間賽和阿根廷球隊河床2:2,兩隊加時後仍然不分勝負,最終艾阿恩互射12碼贏5:4,總比數贏7:6晉級決賽,將會同鹿島鹿角或皇家馬德里爭冠軍。
出爐自由盃冠軍河床今場開波僅三分鐘即失守,俾主隊用角球戰術,由瑞典前鋒馬古斯貝治喺前柱攻入。落後嘅河床喺11分鐘,由山度士波里喺混戰中射入空門追平。呢位哥倫比亞射手喺五分鐘後再有進賬,佢接應隊友直線傳前,喺小禁區右邊窄位射遠柱得手,河床完半場反超前2:1。

換邊後,艾阿恩喺51分鐘靠巴西前鋒卡奧射成2:2。兩隊之後再冇入波,要以互射12碼分勝負。兩隊喺首四輪全數射入,但幫河床主射第五輪嘅安素佩雷斯宴客,艾阿恩中場耶斯林隨後射入奠定勝局嘅12碼,幫艾阿恩爆大冷淘汰河床,躋身世冠盃決賽。
empty
河床(紫衫)一開波就俾艾阿恩(白衫)憑角球戰術攻破大門。路透社