梁詠琪喺2011年閃嫁西班牙籍嘅男友Sergio，婚後生咗混血小公主Sofia，一直過住幸福嘅生活。做咗人妻兼媽咪嘅Gigi，喺Sofia啱啱滿一歲嘅時候，接拍咗電影《骨妹》，Gigi話對佢嚟講，係一個新的啟示：「其實我覺得自己生活上同家庭上變化，對我演戲係有一個好大嘅衝擊，我自己去理解何為愛？呢樣嘢，何為犧牲、珍惜，對呢樣野濃厚咗好多，其實愛係一種，你對另一個人係好著緊，珍惜佢，唔想失去佢，你失去咗一種可惜嘅關係，我覺得生咗小朋友同未生唔同，始終一啲人生經歷對我哋去理解個角色係唔同。」

Gigi話當初睇劇本已經睇到喊，覺得個角色好有挑戰性，亦相當滿意選擇接拍呢套戲：「由細到大好少遇到呢啲角色，試完之後，我覺得係打開自己另一種戲種，當然想試多啲文藝戲種嘅電影，呢套有意識講同性戀，但係又唔係講到好白，大家自己去體會。」

對於家庭和事業，在魚與熊掌的情況下，Gigi希望兩者都可以兼得：「好彩呢套戲全程喺澳門拍攝，可以專心啲，有時間消化沉澱下，我0依然覺得值得做嘅角色，拍嘅戲，值得做嘅工作我要去做，我唔會話生咗仔就留喺屋企，我唔可以同社會脫節，演戲同生活係分割唔到，我要兼顧生活，有生活中嘅體驗，先至可以令到我可以透徹咁了解個角色。」

Gigi仲話：「如果冇咗生活去演戲，係做戲就係做戲！又好似差啲咁，我又覺得自己唔適合剩係生活，我需要生活，抽離家庭，做返我自己，或者做啲自己未完成工作夢想，工作上嘅滿足感，追求吓，又返屋企湊女，平衡吓。先生知道我鍾意做野，識我已經知我好忙，見到我工作中得到快樂，見到我對工作有熱誠，佢唔想我為生仔冇生活，所以佢會全力支持我。」