「秋官效應」對於股民嚟講唔陌生，簡單嚟講就係秋官鄭少秋一有新劇播，個市跌到啪啪聲嘅機會非常之高，1992年播出嘅《大時代》堪稱經典，而近日佢套新劇《詭探前傳》亦都成功推冧咗恒指，而大結局後恒指亦應聲爆升。

話說套劇喺今年4月29日喺ViuTV首播，個市本身仲好地地，但真係唔好唔信邪，喺市場完全冇準備下，隔咗幾日美國總統特朗普突然宣佈話要加徵中國關稅，恒指由高位接近3萬點急瀉，期間最低曾經見過26671點，波幅超過2,000點。

不過《詭探前傳》喺上周五（7日）大結局，恒指今日即刻爆升近613點，原因之一係習近平話特朗普係朋友，可見「秋官效應」嘅命中率真係十分高，亦都意味之後股市可能有運行。查實秋官5月嘅時候一早講通：「都要信吓邪，等吓啦！」大家見到佢真係要睇路。

李華華